MBBS: ଡାକ୍ତରୀ ଶିକ୍ଷା ଏମ୍ବିବିଏସ୍ ନାମଲେଖା ନିୟମ କ୍ଷେତ୍ରରେ ସଂସ୍କାର ପାଇଁ ବୃହତ୍ ପଦକ୍ଷେପ, ଆସନ ସଂଖ୍ୟା ବୃଦ୍ଧି, ନୂଆ ନିୟମ ଜାରୀ
ନୂଆଦିଲ୍ଲୀ: ଡାକ୍ତରୀ ଶିକ୍ଷା (Medical Education) କୁ ସୁଲଭ କରିବା ପାଇଁ ଏକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ଗ୍ରହଣ କରି ଜାତୀୟ ମେଡିକାଲ କମିଶନ (NMC) ତାହାର ପ୍ରଥମ ବଡ଼ଧରଣର ନୀତିନିୟମ ଆଜି ଘୋଷଣା କରିଛି। ବାର୍ଷିକ ଏମ୍ବିବିଏସ୍ (MBBS Admission) ନାମଲେଖା ନିୟମ୨୦୨୦ପାଇଁ ସର୍ବନିମ୍ନ ଆବଶ୍ୟକତା ଶୀଷର୍କରେ ପ୍ରକାଶିତ ଏକ ବିଜ୍ଞପ୍ତିରେ ପୂର୍ବର ଭାରତୀୟ ଭେଷଜ ପରିଷଦ ବା ଏମ୍ସିଆଇର ବାର୍ଷିକ ନାମଲେଖା ସଂକ୍ରାନ୍ତ ୧୯୯୯ର ନିୟମକୁ ରଦ୍ଦ କରାଯାଇଛି।
ନୂଆ ନିୟମ ଅନୁସାରେ ଏଣିକି ଦେଶର ସମସ୍ତ ନୂତନ ପ୍ରସ୍ତାବିତ ମେଡିକାଲ କଲେଜମାନ ସ୍ଥାପନ ହେବ। ଏହି ଆଇନ ଅନୁସାରେ ମଧ୍ୟ ପ୍ରତିଷ୍ଠିତ ହୋଇଥିବା ମେଡିକାଲ କଲେଜଗୁଡିକର ଏମ୍ବିବିଏସ୍ ଆସନ ସଂଖ୍ୟା ବୃଦ୍ଧି କରାଯିବ। ୨୦୨୧-୨୨ପାଠ୍ୟକ୍ରମ ବର୍ଷରୁ ଏହି ନୂଆ ନିୟମ ଲାଗୁ ହେବ। ଏହି ସନ୍ଧିକ୍ଷଣରେ ପ୍ରତିଷ୍ଠିତ ହୋଇସାରିଥିବା ମେଡିକାଲ କଲେଜଗୁଡିକ ଆଜିର ବିଜ୍ଞପ୍ତି ପ୍ରକାଶ ପୂର୍ବରୁ ପ୍ରଚଳିତ ନିୟମ ଅନୁସାରେ କାର୍ଯ୍ୟ କରିବ।
ମେଡିକାଲ ଶିକ୍ଷାନୁଷ୍ଠାନଗୁଡିକର କାର୍ଯ୍ୟ ଓ ଆବଶ୍ୟକତାକୁ ଦୃଷ୍ଟିରେ ରଖି ନୂଆ ଆଇନରେ ନୂତନ ମାନ ଓ ନୀତିମାନ ଧାର୍ଯ୍ୟ କରାଯାଇଛି। ଏଥିରେ ଉପଲବ୍ଧ ସମ୍ବଳର ସର୍ବାଧିକ ବିନିଯୋଗ, ଉତ୍କୃଷ୍ଟ ମାନର ଶିକ୍ଷାଦାନ ପାଇଁ ଅତ୍ୟାଧୁନିକ ଶୈକ୍ଷିକ ଟେକ୍ନୋଲଜିର ଉପଯୋଗ ଏବଂ ସମ୍ବଳ ଦୁର୍ଲ୍ଲଭ ଥିବା ଅବସ୍ଥାରେ ମଧ୍ୟ ଏସବୁ ଶିକ୍ଷାନୁଷ୍ଠାନକୁ କାର୍ଯ୍ୟ କରିବାର ସୁଯୋଗ ଦେବା ଆଦି ଅନ୍ତର୍ଭୁକ୍ତ। ମୋଟାମୋଟି ଭାବେ ନୂଆ ଆଇନ ମେଡିକାଲ କଲେଜ ପ୍ରତିଷ୍ଠା ଏହାର ଶୈକ୍ଷିକ ସମ୍ବଳ ଓ ଛାତ୍ରଛାତ୍ରୀଙ୍କୁ ଶିକ୍ଷାଦାନ ଆଦି କ୍ଷେତ୍ରରେ ନମନୀୟ ବ୍ୟବସ୍ଥା ଗ୍ରହଣ କରାଯାଇଛି।
ଗୁରୁତ୍ୱପୂର୍ଣ୍ଣ ପରିବର୍ତ୍ତନ :-
ନୂଆ ନିୟମରେ ଏକ ନୂତନ ମେଡିକାଲ କଲେଜ ପ୍ରତିଷ୍ଠା ପାଇଁ ପୂର୍ବର ନିର୍ଦ୍ଦିଷ୍ଟ ପରିମାଣ ଜମିର ଆବଶ୍ୟକତାକୁ ଉଠାଇ ଦିଆଯାଇଛି। ସେହିଭଳି ସଂପୃକ୍ତ ମେଡିକାଲ କଲେଜ ସହିତ ସହବନ୍ଧିତ ଟିଚିଂ ହସ୍ପିଟାଲ୍ସଗୁଡିକର ନିର୍ଦ୍ଧାରିତ ଜମି ଆବଶ୍ୟକତା ରହିବ ନାହିଁ। ସଂପୃକ୍ତ ହସ୍ପିଟାଲଗୁଡିକର ସମସ୍ତ ଭବନ ନିର୍ମାଣ ନିର୍ଦ୍ଧାରିତ ନିୟମ ଅନୁସାରେ ହେବା ଉଚିତ। ଏହି ବିଜ୍ଞପ୍ତିରେ ଆହୁରି ମଧ୍ୟ ସବୁ ମେଡିକାଲ କଲେଜରେ ଛାତ୍ରଭିତ୍ତିକ ଇଲାକା (Students Centric Space) କେତେ ରହିବ ତାହାର ସର୍ବନିମ୍ନ ଆବଶ୍ୟକତାକୁ ଧାର୍ଯ୍ୟ କରାଯାଇଛି। ତଦନୁସାରେ ନୂଆ ମେଡିକାଲ କଲେଜର କାର୍ଯ୍ୟକାରୀ ଇଲାକା କେତେ ହେବ ତାହା ମଧ୍ୟ ନିର୍ଦ୍ଧାରିତ ହୋଇଛି। ନୂଆ ନିୟମରେ ଯେଉଁ ମାନ ନିର୍ଦ୍ଧାରଣ କରାଯାଇଛି ସେଥିରେ ସବୁ ମେଡିକାଲ କଲେଜରେ ଉପଲବ୍ଧ ସବୁ ବିଭାଗର ଶିକ୍ଷାଦାନ ଇଲାକାକୁ ହିସାବକୁ ନିଆଯିବ। ପୂର୍ବରୁ ଏହା ସବୁ ବିଭାଗ ପାଇଁ ଭିନ୍ନ ଭିନ୍ନ ଥିଲା ଏବଂ ଏହି ସୁବିଧାକୁ ଏକକଭାବେ ହିସାବକୁ ନିଆଯାଉ ନ ଥିଲା। ନୂଆ ବ୍ୟବସ୍ଥାରେ ମେଡିକାଲ କଲେଜର ସମସ୍ତ ପାଠପଢା ସ୍ଥାନ ଇ-ଲର୍ଣ୍ଣିଂ (e-Learning) ପାଇଁ ଉପଲବ୍ଧ ହେବ ଏବଂ ପରସ୍ପର ପରସ୍ପର ସହିତ ଡିଜିଟାଲ ବ୍ୟବସ୍ଥାରେ ସଂଯୁକ୍ତ ହେବେ।
ନୂଆ ନିୟମ ଅନୁସାରେ ଏକ ସ୍ୱୟଂ ସଂପୂର୍ଣ୍ଣ ସ୍କିଲ ଲାବରେଟୋରୀ (Skills Laboratory) ଛାତ୍ରଛାତ୍ରୀଙ୍କୁ ତାଲିମ ଦେବା ପାଇଁ ଅପରିହାର୍ଯ୍ୟ ହୋଇଛି। ସେହିଭଳି ମେଡିକାଲ ଶିକ୍ଷକମାନଙ୍କୁ ତାଲିମ ଦେବା ପାଇଁ ନୂଆ ବ୍ୟବସ୍ଥାରେ ମେଡିକାଲ ଶିକ୍ଷା ୟୁନିଟ ଗଠନ ବ୍ୟବସ୍ଥା କରାଯାଇଛି। ଏହାଛଡା ଲାଇବ୍ରେରୀ ପାଇଁ ଆବଶ୍ୟକ ସ୍ଥାନ ଏବଂ ଏଥିରେ ପୁସ୍ତକ ଓ ପତ୍ରପତ୍ରିକା କେତେ ରହିବ ତାହାକୁ ମଧ୍ୟ ପୂର୍ବାପେକ୍ଷା ହ୍ରାସ କରାଯାଇ ଯୁକ୍ତିଯୁକ୍ତ କରାଯାଇଛି।
ନୂଆ ବ୍ୟବସ୍ଥାରେ ଷ୍ଟୁଡେଣ୍ଟ କାଉନ୍ସେଲିଂ ସେବା ବାଧ୍ୟତାମୂଳକ ହୋଇଛି। ସଂପ୍ରତି ଡାକ୍ତରୀ ଛାତ୍ରଛାତ୍ରୀ ଓ ରେସିଡେଣ୍ଟ ଡାକ୍ତରମାନଙ୍କ ମଧ୍ୟରେ ମାନସିକ ଚାପ ବଢୁଥିବାରୁ ତାହାର ନିରାକରଣ ପାଇଁ ଏହି ସେବା ପ୍ରବର୍ତ୍ତନର ବ୍ୟବସ୍ଥା ହୋଇଛି । ମେଡିକାଲ ଟ୍ରେନିଂ କ୍ଷେତ୍ରରେ ଉତ୍ତମଭାବେ କାର୍ଯ୍ୟ କରୁଥିବା ଏକ ହସ୍ପିଟାଲର ଭୂମିକାକୁ ନୂଆ ନିୟମରେ ଯଥୋଚିତ ମାନ୍ୟତା ପ୍ରଦାନ କରାଯାଇଛି। ତଦନୁସାରେ ୩୦୦ ଶଯ୍ୟା ବିଶିଷ୍ଟ ସଂପୂର୍ଣ୍ଣ କାର୍ଯ୍ୟକ୍ଷମ ଏକ ମଲ୍ଟି ସ୍ପେଶାଲିଟି ହସ୍ପିଟାଲ ପ୍ରତିଷ୍ଠା ପାଇଁ ଆବେଦନ କଲେ ଆବେଦନକାରୀଙ୍କୁ ୨ ବର୍ଷ ମଧ୍ୟରେ ଏହିସବୁ ସୁବିଧା ଓ ଭିତ୍ତିଭୂମି ପୂରଣ କରିବାର ବ୍ୟବସ୍ଥା ରହିଛି। ପୂର୍ବ ନିୟମରେ ଏଭଳି ହସ୍ପିଟାଲ ପ୍ରତିଷ୍ଠା ପାଇଁ ସମୟସମୀ ଧାର୍ଯ୍ୟ କରାଯାଇ ନ ଥିଲା। ଟିଚିଂ ହସ୍ପିଟାଲରେ ବିଭିନ୍ନ ବିଭାଗରେ ଆବଶ୍ୟକ ହେଉଥିବା ଶଯ୍ୟାକୁ ଯୁକ୍ତିଯୁକ୍ତ କରାଯାଇଛି। ଏହା ବାର୍ଷିକ ଡାକ୍ତରୀ ଛାତ୍ରଛାତ୍ରୀ ଗ୍ରହଣ, କ୍ଲିନିକାଲ ସ୍ପେଶାଲିଟିସ୍ ପାଇଁ ବିନିଯୋଗ ହେଉଥିବା ପାଠପଢା ସମୟ ଆଦି ସହିତ ସଂଯୁକ୍ତ ହୋଇଛି। ଏହାଛଡା ଏଭଳି ମେଡିକାଲ କଲେଜରେ ସର୍ବନିମ୍ନ ଆବଶ୍ୟକ ଡାକ୍ତରୀ ଉପକରଣର ସୀମା ମଧ୍ୟ ହ୍ରାସ କରାଯାଇଛି। ଆବଶ୍ୟକସ୍ଥଳେ ଅଣ୍ଡର ଗ୍ରାଜୁଏଟ ମେଡିକାଲ ଟ୍ରେନିଂ ପାଇଁ ପୂର୍ବାପେକ୍ଷା ୧୦ ଶତାଂଶ ଟିଚିଂ ବେଡ୍ର ବ୍ୟବସ୍ଥା କମ୍ ହୋଇଛି।
ନୂଆ ନିୟମରେ ସର୍ବନିମ୍ନ ନିର୍ଦ୍ଧାରିତ ଫାକଲ୍ଟି ସହିତ ଭିଜିଟିଂ ଫାକଲ୍ଟି ବ୍ୟବସ୍ଥା କରାଯାଇ ଟ୍ରେନିଂର ମାନ ବୃଦ୍ଧି ପାଇଁ ବ୍ୟବସ୍ଥା ରହିଛି। ଅଣ୍ଡର ଗ୍ରାଜୁଏଟ ମେଡିକାଲ ଛାତ୍ରଛାତ୍ରୀଙ୍କୁ ତାଲିମ ପ୍ରଦାନ ପାଇଁ ନୂଆ ବ୍ୟବସ୍ଥାରେ ସବୁ ମେଡିକାଲ କଲେଜ ପାଇଁ ଦୁଇଟି ନୂଆ ଟିଚିଂ ଡିପାର୍ଟମେଣ୍ଟ ବାଧ୍ୟତାମୂଳକ କରାଯାଇଛି। ସେ ଦୁଇଟି ହେଲା ଏମର୍ଜେନ୍ସି ମେଡିକାଲ ବିଭାଗ ଓ ଫିଜିକାଲ ମେଡିସିନ ଏବଂ ରିହାବିଲିଟେସନ ବିଭାଗ। ଆଗରୁ ଏମ୍ର୍ଜେନ୍ସି ମେଡିକାଲ ବିଭାଗଟି କାଜୁଆଲ୍ଟି ବିଭାଗଭାବେ ପରିଚିତ ଥିଲା। ଏହି ନୂଆ ବିଭାଗଟି ରୋଗୀଙ୍କୁ ତୁରନ୍ତ ସେବା ଯୋଗାଇଦେବ। ଏହାଛଡା ଏହି ବିଭାଗ ସେମାନଙ୍କ ଜୁରୁରୀ ଚିକିତ୍ସା ଆବଶ୍ୟକତା ଅନୁସାରେ ତୁରନ୍ତ ଓ ଉପଯୁକ୍ତ ଚିକିତ୍ସା ବ୍ୟବସ୍ଥା କରିବ। ବିଶେଷ କରି ଟ୍ରମା କ୍ଷେତ୍ରରେ ରୋଗୀଙ୍କ ଚିକିତ୍ସାକୁ ଅଗ୍ରାଧିକାର ଦିଆଯିବ। ସେହିଭଳି ବାଧ୍ୟତାମୂଳକ ଅନ୍ୟ ବିଭାଗଟି ହେଲା ଫିଜିକାଲ ମେଡିସିନ ଓ ରିହାବିଲିଟେସନ। ଯେଉଁ ରୋଗୀମାନେ ପୂର୍ଣ୍ଣାଙ୍ଗ ଥଇଥାନ ଚିକିତ୍ସା ଓ ଯତ୍ନ ଲୋଡୁଛନ୍ତି ଏହି ବିଭାଗ ସେମାନଙ୍କର ଆବଶ୍ୟକତା ପୂରଣ କରିବ। ନୂଆ ନିୟମରେ ‘ଡିଜାଏରେବଲ’ ଓ ‘ଆସ୍ପିରେସନେବୁଲ’ ଲକ୍ଷ୍ୟକୁ ଗୁରୁତ୍ୱ ଦିଆଯାଇଛି। ସର୍ବନିମ୍ନ ଆବଶ୍ୟକତା ବାହାରେ ଏହି ଦୁଇଟି ବିଷୟ ରହିଛି। ମେଡିକାଲ କଲେଜ ଓ ହସ୍ପିଟାଲ ଭଳି ଅନୁଷ୍ଠାନର ଉତ୍କର୍ଷ ବୃଦ୍ଧିକୁ ପ୍ରୋତ୍ସାହିତ କରିବା ନିମନ୍ତେ ଏହି ଦୁଇଟି ମାନ ନୂଆ ନିୟମରେ ଯୋଡା ଯାଇଛି। ଜାତୀୟ ମେଡିକାଲ କମିଶନ ଦେଶର ମେଡିକାଲ ପ୍ରତିଷ୍ଠାନଗୁଡିକର ରେଟିଂ ନିର୍ଦ୍ଧାରଣ କରିବା ସମୟରେ ଏସବୁ ବିଷୟବସ୍ତକୁ ବିଚାରକୁ ନେବ।
Also Read | Odisha Covid 19: ଆଜି ରାଜ୍ୟରେ ୧୭୦୯ ଜଣ କରୋନା ସଂକ୍ରମିତ ଚିହ୍ନଟ
