୭୪ ତମ ସ୍ୱାଧୀନତା ଦିବସରେ ଦେଶବାସୀଙ୍କ ଉଦ୍ଦେଶ୍ୟରେ ରାଷ୍ଟ୍ରପତି ଶ୍ରୀ ରାମନାଥ କୋବିନ୍ଦଙ୍କ ସମ୍ବୋଧନ

ନୂଆଦିଲ୍ଲୀ:ଦେଶର ୭୪ ତମ ସ୍ୱାଧୀନତା ଦିବସ ଉପଲକ୍ଷେ  ରାଷ୍ଟ୍ରପତି ରାମନାଥ କୋବିନ୍ଦ ଦେଶକୁ ସମ୍ବୋଧିତ କରି, ଅଗଷ୍ଟ ୧୫ ଆମକୁ ତ୍ରିରଙ୍ଗା ପତାକା ଉତ୍ତୋଳନ ସହିତ ଏହି ଉତ୍ସବରେ ଅଂଶଗ୍ରହଣ ଏବଂ ଦେଶାତ୍ମବୋଧକ ସଂଗୀତ ଶୁଣିବାର ଉତ୍ସାହ ଦିଏ। ଏହି ଦିବସରେ ଦେଶର ଯୁବ ସମାଜ ଏକ ସ୍ୱାଧୀନ ଭାରତର ନାଗରିକ ହେବାର ସ୍ୱତନ୍ତ୍ର ଗର୍ବ ଅନୁଭବ କରିବା ଉଚିତ। ଏକ ସ୍ୱାଧୀନ ରାଷ୍ଟ୍ରରେ ବଞ୍ଚିବା ପାଇଁ ନିଜ ଜୀବନ ଉତ୍ସର୍ଗ କରି ଆମକୁ ସମର୍ଥ କରିଥିବା ଆମର ସ୍ୱାଧୀନତା ସଂଗ୍ରାମୀ ଓ ଶହୀଦମାନଙ୍କୁ ଆମେ ଏହି ଅବସରରେ କୃତଜ୍ଞତାର ସହ ସ୍ମରଣ କରୁଛୁ।

ଆମ ସ୍ୱାଧୀନତା ସଂଗ୍ରାମର ସ୍ୱଭାବ ଓ ସଦାଚାର ଆଧୁନିକ ଭାରତର ମୂଳଦୁଆ ପ୍ରତିଷ୍ଠା କରିଛି । ଆମର ଦୂରଦୃଷ୍ଟି ସଂପନ୍ନ ନେତୃଗଣ ମିଳିତଭାବେ ଏକ ବିବିଧ ବିଶ୍ୱ ଦୃଷ୍ଟିକୋଣରେ ଗୋଟିଏ ସାଧାରଣ ଜାତୀୟ ଚେତନା ସୃଷ୍ଟି କରିଥିଲେ । ଅତ୍ୟାଚାରୀ ବିଦେଶୀ ଶାସନରୁ ଭାରତମାତାକୁ ମୁକ୍ତକରି ତାହାର ସନ୍ତାନମାନଙ୍କ ଭବିଷ୍ୟତକୁ ସୁରକ୍ଷିତ କରିବା ପାଇଁ ସେମାନେ ଅଙ୍ଗୀକୃତ ଥିଲେ । ସେମାନଙ୍କ ବିଚାର ଓ କାର୍ଯ୍ୟ ଏକ ଆଧୁନିକ ରାଷ୍ଟ୍ରର ପରିଚୟକୁ ଆକାର ଦେଇଥିଲା ।

ରାଷ୍ଟ୍ରପତି କହିଛନ୍ତି,ଆମେ ଭାଗ୍ୟବାନ ଯେ ମହାତ୍ମା ଗାନ୍ଧୀ ଆମ ମୁକ୍ତି ଆନ୍ଦୋଳନର ଦିଗ୍‌ଦ୍ରଷ୍ଟା ଓ ଆଲୋକବର୍ତ୍ତିକା ଥିଲେ। ସେ ଉଭୟ ସନ୍ଥ ଓ ରାଜନେତାଭାବେ ଏକ ସଂବୃତିରେ ପରିଣତ ହୋଇଥିଲେ, ଯାହା କେବଳ ଭାରତରେ ସମ୍ଭବ ହୋଇଥିଲା। ସାମାଜିକ ଅସ୍ଥିରତା, ଆର୍ଥିକ ସମସ୍ୟା, ଜଳବାୟୁ ପରିବର୍ତ୍ତନ ଆଦି ସମସ୍ୟା ଦ୍ୱାରା ଜର୍ଜରିତ ହୋଇପଡିଥିବା ସମଗ୍ର ବିଶ୍ୱ ଏଥିରୁ ପରିତ୍ରାଣ ପାଇବା ପାଇଁ ଗାନ୍ଧୀଜୀଙ୍କ ଦର୍ଶନ ଓ ଶିକ୍ଷାରୁ ବାଟ ଖୋଜୁଛି। ଯୁବ ପିଢି ଗାନ୍ଧୀଜୀଙ୍କୁ ପୁନଃ ଆବିଷ୍କାର କରୁଥିବା ଦେଖି ମୁଁ ବିଶେଷ ଆନନ୍ଦିତ। ଚଳିତ ବର୍ଷର ସ୍ୱାଧୀନତା ଦିବସ ଉତ୍ସବ ପାଳନରେ କିଛିଟା ସଂଯମ ଓ ନିୟନ୍ତ୍ରଣ ରହିବ। ଏହାର କାରଣ ସମସ୍ତଙ୍କୁ ଜଣା। ଏକ ଭୟାନକ ଭୂତାଣୁ ସହ ସମଗ୍ର ବିଶ୍ୱ ଏବେ ଲଢେଇ କରୁଛି। ଏହାର ସଂକ୍ରମଣ ଯୋଗୁଁ ସମସ୍ତ ପ୍ରକାର କାର୍ଯ୍ୟ ବ୍ୟାହତ ହୋଇଛି ଏବଂ ବହୁ ଲୋକ ପ୍ରାଣ ହରାଇଛନ୍ତି। ଆମେ ପୂର୍ବରୁ ଯେଉଁ ପୃଥିବୀରେ ବଞ୍ଚିଥିଲୁ ତାହାକୁ ଏହି ମହାମାରୀ ବଦଳାଇ ଦେଇଛି।

ଏହା ଆଶ୍ୱସ୍ତିର ବିଷୟ ଯେ କେନ୍ଦ୍ର ସରକାର ଏହି ମହାମାରୀର ବିରାଟ ଆହ୍ୱାନକୁ ଯଥେଷ୍ଟ ପୂର୍ବରୁ ଅନୁମାନ କରି ଉପଯୁକ୍ତ ସମୟରେ ଆବଶ୍ୟକ ପଦକ୍ଷେପମାନ ସଫଳତାର ସହ ଗ୍ରହଣ କରିଥିଲେ। ଭାରତ ଭଳି ଏକ ବିରାଟ ଓ ବିପୁଳ ଜନସଂଖ୍ୟା ବିଶିଷ୍ଟ ବିବିଧତାପୂର୍ଣ୍ଣ ଦେଶରେ ଏଭଳି ଆହ୍ୱାନର ମୁକାବିଲା କରିବା ପାଇଁ ଦୃଢ ମାନବୀୟ ଦକ୍ଷତା ଓ ଉଦ୍ୟମ ଦରକାର ପଡେ। ସ୍ଥାନୀୟ ସ୍ଥିତିକୁ ବିଚାରକୁ ନେଇ ସବୁ ରାଜ୍ୟ ସରକାର ଆବଶ୍ୟକ ପଦକ୍ଷେପମାନ ଗ୍ରହଣ କରିଥିଲେ। ଜନସାଧାରଣ ମଧ୍ୟ ଏଥିରେ ପୂର୍ଣ୍ଣପ୍ରାଣରେ ସହାୟତା ଯୋଗାଇଥିଲେ। ଆମର ଅଙ୍ଗୀକୃତ ପ୍ରୟାସ ଦ୍ୱାରା ଆମେ ମହାମାରୀର ବ୍ୟାପକ ପ୍ରଭାବକୁ ନିୟନ୍ତ୍ରିତ ତଥା ସୀମିତ କରିବାରେ ସଫଳ ହୋଇଛୁ। ଏହାଦ୍ୱାରା ଅନେକ ଜୀବନ ରକ୍ଷା ପାଇଛି। ବୃହତ୍ତର ବିଶ୍ୱପାଇଁ ଏହା ଏକ ଉଦାହରଣ।

ସେ କହିଛନ୍ତି ଯେ ଚିକିତ୍ସକ, ନର୍ସ ଓ ଅନ୍ୟାନ୍ୟ ସ୍ୱାସ୍ଥ୍ୟକର୍ମୀଙ୍କ ପାଖରେ ଦେଶ ଋଣୀ। ସେମାନେ ନିରନ୍ତର ଏହି ଭୂତାଣୁ ବିରୋଧୀ ଲଢେଇର ସମ୍ମୁଖ ଭାଗରେ ରହିଛନ୍ତି। ଦୁର୍ଭାଗ୍ୟର ବିଷୟ ହେଲା ସେମାନଙ୍କ ମଧ୍ୟରୁ ଅନେକ ଏହି ମହାମାରୀ ଲଢିବାବେଳେ ନିଜର ଜୀବନ ହରାଇଛନ୍ତି। ସେମାନେ ଆମ ରାଷ୍ଟ୍ରର ନାୟକ। ସବୁ କରୋନା ଯୋଦ୍ଧା ଉଚ୍ଚପ୍ରଶଂସାର ପାତ୍ର। ସେମାନେ ନିଜ ନିଜର ଦାୟିତ୍ୱ ଓ କର୍ତ୍ତବ୍ୟର ବହୁ ଊର୍ଦ୍ଧ୍ଵକୁ ଯାଇ ଲୋକଙ୍କ ଜୀବନ ରକ୍ଷା କରିବା ସହିତ ଅତ୍ୟାବଶ୍ୟକ ସେବାକୁ ନିଶ୍ଚିତ କରିଛନ୍ତି। ଏହି ଡାକ୍ତର, ସ୍ୱାସ୍ଥ୍ୟକର୍ମୀ, ବିପର୍ଯ୍ୟୟ ପରିଚାଳନା ଦଳର ସଦସ୍ୟ, ପୁଲିସ କର୍ମଚାରୀ, ସଫେଇ କର୍ମଚାରୀ, ଡେଲିଭରି ଷ୍ଟାଫ୍‌, ପରିବହନ, ରେଳବାଇ ଓ ବିମାନ କର୍ମଚାରୀ, ବିଭିନ୍ନ ସେବା ଯୋଗାଣକାରୀ, ସରକାରୀ କର୍ମଚାରୀ, ସମାଜସେବୀ ସଂଗଠନ ଏବଂ ଦୟାଳୁ ନାଗରିକମାନେ ଅଦମ୍ୟ ସାହସ ଓ ନିଃସ୍ୱାର୍ଥ ସେବାର ପ୍ରେରଣାଦାୟୀ କାହାଣୀମାନ ରଚନା କରୁଛନ୍ତି। ସେମାନେ ସେତେବେଳେ ଅକ୍ଳାନ୍ତ ପରିଶ୍ରମ କରି ଲୋକେ ଯେପରି ସ୍ୱାସ୍ଥ୍ୟସେବା, ରିଲିଫ, ପାନୀୟଜଳ, ବିଜୁଳି, ପରିବହନ ଓ ଯୋଗାଯୋଗ ସୁବିଧା, କ୍ଷୀର ଓ ପନିପରିବା, ଖାଦ୍ୟ ଓ ଦୋକାନ ସଉଦା, ଔଷଧପତ୍ର ଏବଂ ଅନ୍ୟାନ୍ୟ ଅତ୍ୟାବଶ୍ୟକୀୟ ସାମଗ୍ରୀରୁ ବଞ୍ଚିତ ନ ହୁଅନ୍ତି ତାହା ନିଶ୍ଚିତ କରୁଛନ୍ତି । ସେମାନେ ନିଜ ଜୀବନକୁ ବିପନ୍ନ କରି ଆମ ଜୀବନ ଓ ଜୀବିକାକୁ ସୁରକ୍ଷିତ କରିଛନ୍ତି।

ସେହିପରି ରାଷ୍ଟ୍ରପତି କହିଛନ୍ତି ଯେ ,ଏହି ସଂକଟକାଳରେ ଅମ୍ଫନ ବାତ୍ୟା ପଶ୍ଚିମବଙ୍ଗ ଓ ଓଡ଼ିଶାରେ ବିତ୍ପାତ ସୃଷ୍ଟି କରିଥିଲା। ବିପର୍ଯ୍ୟୟ ପରିଚାଳନା ଟିମ୍‌ କେନ୍ଦ୍ରୀୟ ଓ ରାଜ୍ୟ ସରକାରଙ୍କ ବିଭିନ୍ନ ସଂସ୍ଥା ତଥା ସତର୍କ ନାଗରିକମାନଙ୍କ ମିଳିତ ପ୍ରୟାସ ଫଳରେ ଜୀବନହାନିକୁ ଯଥେଷ୍ଟ ହ୍ରାସ କରାଯାଇପାରିଥିଲା। ଦେଶର ଉତ୍ତର ପୂର୍ବାଞ୍ଚଳ ଓ ପୂର୍ବ ଭାଗରେ ଏବେ ବନ୍ୟା ବିତ୍ପାତ ଦ୍ୱାରା ଲୋକେ ପ୍ରଭାବିତ। ସେମାନଙ୍କ ଜୀବନଯାତ୍ରା ବ୍ୟାହତ ହୋଇଛ। ବିପର୍ଯ୍ୟୟର ଏହି ସମୟରେ ସମାଜର ସବୁ ବର୍ଗର ଲୋକେ ମିଳିମିଶି ଦୁର୍ଦ୍ଦଶାଗ୍ରସ୍ତଙ୍କୁ ସହାୟତା କରିବା ସନ୍ତୋଷଜନକ ବିଷୟ।

ସେ ପୁଣି କହିଛନ୍ତି ଯେ ,ମହାମାରୀ ଦ୍ୱାରା ଗରିବ ଓ ଦିନମଜୁରିଆ ଅଧିକ ପ୍ରଭାବିତ ହୋଇଛନ୍ତି। ସଂକଟର ଏହି କ୍ଷଣରେ ସେମାନଙ୍କୁ ସାହାଯ୍ୟ ଓ ସମର୍ଥନ କରିବା ପାଇଁ ଭୂତାଣୁ ନିୟନ୍ତ୍ରଣ କାର୍ଯ୍ୟ ସହିତ କଲ୍ୟାଣକାରୀ କାର୍ଯ୍ୟମାନ ମଧ୍ୟ ହାତକୁ ନିଆଯାଇଛି। ସରକାର ପ୍ରଧାନମନ୍ତ୍ରୀ ଗରିବ କଲ୍ୟାଣ ଯୋଜନାକୁ କାର୍ଯ୍ୟକାରୀ କରି କୋଟି କୋଟି ଲୋକଙ୍କୁ ସେମାନଙ୍କର ଜୀବିକା ଅର୍ଜନର ସୁଯୋଗ ଦେଇଛନ୍ତି। ଏହା ଫଳରେ ନିଯୁକ୍ତି ହାନି, ବିଚ୍ଛିନ୍ନ ହୋଇରହିବା ଏବଂ ଇତଃସ୍ତତ ଅବସ୍ଥାରେ କାଳାତିପାତ କରିବାର ପ୍ରଭାବ ହ୍ରାସ ପାଇଛି। ବିଭିନ୍ନ ପ୍ରକାର କାର୍ଯ୍ୟକ୍ରମ ମାଧ୍ୟମରେ ସରକାର ଲୋକଙ୍କୁ ସହାୟତାର ହାତ ବଢାଉଛନ୍ତି। ଏହି କାର୍ଯ୍ୟରେ କର୍ପୋରେଟ ଉଦ୍ୟୋଗ, ନାଗରିକ ସମାଜ ଓ ନାଗରିକମାନେ ପୂର୍ଣ୍ଣପ୍ରାଣରେ ସହଯୋଗ କରୁଛନ୍ତି। ଅତି ଅଭାବୀ ଲୋକଙ୍କୁ ମାଗଣାରେ ଖାଦ୍ୟଶସ୍ୟ ଯୋଗାଇ ଦିଆଯାଉଛି । ଫଳରେ କୌଣସି ପରିବାର ଭୋକିଲା ରହିବାର ଅବକାଶ ନାହିଁ। ବିଶ୍ୱର ଯେକୌଣସି ସ୍ଥାନରେ ଅଟକି ରହିଥିବା ଆମ ଦେଶର ନାଗରିକଙ୍କୁ ସ୍ୱଦେଶ ଫେରାଇ ଆଣିବାକୁ ଆମ ସରକାର ବଦ୍ଧପରିକର ହୋଇ କାର୍ଯ୍ୟ କରୁଛନ୍ତି। 

ଆମେ ନିଜ ପାଇଁ କେବଳ ବଞ୍ଚିବାରେ ବିଶ୍ୱାସ କରୁନା, ସମଗ୍ର ବିଶ୍ୱର କଲ୍ୟାଣ କଥା ମଧ୍ୟ ଚିନ୍ତା କର। ଏହା ଭାରତର ଏକ ପରମ୍ପର। ଭାରତର ଆତ୍ମନିର୍ଭରଶୀଳତାର ଅର୍ଥ ଅନ୍ୟଠାରୁ ଦୂରେଇ ଯାଇ ବା ପୃଥକ ରହି ଆତ୍ମନିର୍ଭର ହେବା ନୁହେଁ। ଏହାର ଅର୍ଥ ନିଜେ ନିଜର ଆବଶ୍ୟକତା ପୂରଣ କରି ଆତ୍ମନିର୍ଭର ହେବା। ନିଜର ପରିଚୟ ବଜାୟ ରଖି ବିଶ୍ୱ ଅର୍ଥନୀତିରେ ନିଜର ସହଯୋଗ ଅବ୍ୟାହତ ରଖିବାକୁ ଭାରତ ଅଙ୍ଗୀକୃତ। ବସୁଧୈବ କୁଟୁମ୍ବକମ୍‌ ବା ସମଗ୍ର ବିଶ୍ୱ ଏକ ପରିବାର ଭଳି ଯେଉଁକଥା ଆମ ମୁନିଋଷିମାନେ କହିଥିଲେ ସମଗ୍ର ବିଶ୍ୱ ଏବେ ତାହା ବୁଝୁଛି। ସାରା ଦୁନିଆ ଯେତେବେଳେ ମିଳିତଭାବେ ମାନବ ସମାଜ ଆଗରେ ଦେଖାଦେଇଥିବା ଆହ୍ୱାନର ମୁକାବିଲା କଥା ଚିନ୍ତା କରୁଛି ଠିକ୍‌ ସେତିକିବେଳେ ଆମ ପଡ଼ିଶାରେ କେହି ଜଣେ ତାହାର ବିସ୍ତାରବାଦୀ ଦୁଃସାହସ ଦେଖାଉଛି। ସୀମାର ସୁରକ୍ଷା ପାଇଁ ଆମ ସାହସୀ ସୈନିକମାନେ ଶହୀଦ ହୋଇଛନ୍ତି। ଭାରତମାତାର ଏହି ସୁଯୋଗ୍ୟ ସନ୍ତାନମାନେ ଜାତୀୟ ଗର୍ବ ଓ ଗୌରବ ପାଇଁ ବଞ୍ଚିଥିଲେ ଏବଂ ସମାନ ଉଦ୍ଦେଶ୍ୟରେ ଶହୀଦ ହୋଇଛନ୍ତି । ଆମ ପ୍ରତିରକ୍ଷା ବାହିନୀ, ଅର୍ଦ୍ଧସାମରିକ ବାହିନୀ ଏବଂ ପୁଲିସ ବାହିନୀର ସଦସ୍ୟଙ୍କ ପାଇଁ ଆମେ ଗର୍ବିତ। ସେମାନେ ଆମ ସୀମାକୁ ସୁରକ୍ଷିତ କରିବା ସହ ଆମର ଆଭ୍ୟନ୍ତରୀଣ ନିରାପତ୍ତାକୁ ସୁରକ୍ଷିତ କରିଛନ୍ତି।

ରାଷ୍ଟ୍ରପତି କହିଛନ୍ତିଯେ ,ଚଳିତ ବର୍ଷରେ ଆମେ କିଛି କଠୋର ଶିକ୍ଷା ପାଇଲେ । ମଣିଷ ପ୍ରକୃତିର ପ୍ରଭୁ ବୋଲି ଯେଉଁ ଧାରଣା ଥିଲା ଏକ ଅଦୃଶ୍ୟ ଭୂତାଣୁ ତାହାକୁ ମିଥ୍ୟା ପ୍ରମାଣିତ କରିଛି। ମୁଁ ଭାବୁଛି ମଣିଷ ନିଜକୁ ସଂଶୋଧନ କରି ପ୍ରକୃତି ସହ ସମନ୍ୱୟ ରକ୍ଷା ପୂର୍ବକ ବଞ୍ଚିବା ପାଇଁ ଏବେ ବି ଅଧିକ ବିଳମ୍ବ ହୋଇନାହିଁ। ମହାମାରୀ ଓ ଜଳବାୟୁ ପରିବର୍ତ୍ତନ ଭଳି ଘଟଣାବଳୀ ବିଶ୍ୱ ସମୁଦାୟକୁ ଆମର ମିଳିତ ଭାଗ୍ୟ ସଂପର୍କରେ ଚେତାଇ ଦେଇଛି। କରୋନା ସଂକ୍ରମଣ ମଣିଷ ସମାଜ ଦ୍ୱାର ସୃଷ୍ଟ। ଏହା କୃତ୍ରିମ ବିଭାଜନକୁ ଚିହ୍ନେନା। ଏଥିରୁ ଆମର ଶିକ୍ଷା ହେଲା ଆମକୁ ସମସ୍ତ ମନୁଷ୍ୟକୃତ ବିଭେଦ, ଧାରଣା, ପକ୍ଷପାତି ବିଚାର ଓ ପ୍ରତିବନ୍ଧକର ଉପରକୁ ଉଠିବାକୁ ପଡିବ।

ସେ କହିଛନ୍ତି,ଆମର ପିଲା ଓ ଯୁବକମାନଙ୍କୁ ଏକ ଭବିଷ୍ୟବାଦୀ ଶିକ୍ଷା ପ୍ରଦାନ କରିବା ପାଇଁ କେନ୍ଦ୍ର ସରକାର ଜାତୀୟ ଶିକ୍ଷାନୀତି କାର୍ଯ୍ୟକାରୀ କରିବାକୁ ନିଷ୍ପତ୍ତି ନେଇଛନ୍ତି। ଏହା କାର୍ଯ୍ୟକାରୀ ହେଲେ ଏକ ନୂଆ ଉନ୍ନତମାନର ଶିକ୍ଷା ବ୍ୟବସ୍ଥା ବିକଶିତ ହେବା ସହ ଭବିଷ୍ୟତର ଆହ୍ୱାନକୁ ସୁଯୋଗରେ ପରିଣତ କରିପାରିବ ଏବଂ ନୂଆ ଭାରତ ପାଇଁ ରାସ୍ତା ଦେଖାଇବ ବୋଲି ମୁଁ ଦୃଢ ନିଶ୍ଚିତ। ଆମର ଯୁବ ସମାଜ ନିଜ ନିଜର ଆଗ୍ରହ ଓ ମେଧା ଅନୁସାରେ ସ୍ୱାଧୀନଭାବେ ଏହି ବ୍ୟବସ୍ଥାରେ ନିଜର ପାଠ୍ୟ ବିଷୟ ବାଛିପାରିବେ। ଏହାଦ୍ୱାରା ସେମାନେ ନିଜର ଦକ୍ଷତା ଅନୁଭବ କରିବାର ସୁଯୋଗ ପାଇବେ। ଆମର ଭବିଷ୍ୟତର ବଂଶଧର ଏହି ନବସାମର୍ଥ୍ୟ ଦ୍ୱାରା କେବଳ ନିଯୁକ୍ତି ପାଇବେ ନାହିଁ, ବରଂ ଅନ୍ୟମାନଙ୍କ ପାଇଁ ମଧ୍ୟ ନିଯୁକ୍ତି ସୁଯୋଗ ସୃଷ୍ଟି କରିପାରିବେ।

ରାଷ୍ଟ୍ରପତି କହିଛନ୍ତି ଯେ,  ଯେ ଭାରତ ଯେତେବେଳେ ସ୍ୱାଧୀନ ହେଲା ସେତେବେଳେ ଅନେକଙ୍କର ଅନୁମାନ ଥିଲା ଯେ ଗଣତନ୍ତ୍ର ସହିତ ଆମର ପରୀକ୍ଷା ନିରୀକ୍ଷା ବେଶୀଦିନ ଚାଲିବ ନାହିଁ। ଶାସନର ଗଣତାନ୍ତ୍ରିକ ପ୍ରକ୍ରିୟାରେ ସେମାନେ ଆମର ପ୍ରାଚୀନ ପରମ୍ପରା ଓ ସମୃଦ୍ଧ ବିବିଧତାକୁ ଏକ ପ୍ରତିବନ୍ଧକଭାବେ ଦେଖିଥିଲେ; କିନ୍ତୁ ଆମେ ସବୁବେଳେ ଏହି ବିବିଧତା ଓ ପରମ୍ପରାକୁ  ଏକ ଶକ୍ତିଭାବେ ଗ୍ରହଣ କରିଆସିଛୁ ଏବଂ ଏହା ବିଶ୍ୱର ସର୍ବବୃହତ୍‌ ଗଣତନ୍ତ୍ରକୁ ଏବେ ଚମକାଉଛି। ମାନବ କଲ୍ୟାଣ ପାଇଁ ଭାରତକୁ ତାହାର ନେତୃତ୍ୱ ଭୂମିକା ବଜାୟ ରଖିବାକୁ ପଡିବ।

ଶେଷରେ ରାଷ୍ଟ୍ରପତି କହିଛନ୍ତି ଯେ  ବୌଦ୍ଧିକ, ଆଧ୍ୟାତ୍ମିକ ଏବଂ ବିଶ୍ୱ ଶାନ୍ତି କ୍ଷେତ୍ରରେ ଆନ୍ତର୍ଜାତିକ ସମୁଦାୟକୁ ଆମକୁ ଯଥେଷ୍ଟ କିଛି ପ୍ରଦାନ କରିବାର ଅଛି। ଏହି ଭାବନାର ସହିତ ମୁଁ ସମସ୍ତଙ୍କର କଲ୍ୟାଣ କାମନା କରି ଏହି ପ୍ରାର୍ଥନା ଗାଉଛି।