Mahatma Gandhi visited Odisha:ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନର ୧୦୦ ବର୍ଷ ପୂର୍ତ୍ତି ଅବସରରେ ସ୍ମାରକୀ ଡାକ ଟିକେଟ ଉନ୍ମୋଚନ

ନୂଆଦିଲ୍ଲୀ: କେନ୍ଦ୍ର ଶିକ୍ଷା, ସଞ୍ଚାର ଓ ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତି ରାଷ୍ଟ୍ର ମନ୍ତ୍ରୀ ଶ୍ରୀ ସଞ୍ଜୟ ଧୋତ୍ରେ ମହାତ୍ମା ଗାନ୍ଧୀ (Mahatma Gandhi) ଙ୍କ ଓଡ଼ିଶା (Odisha) ଆଗମନର ୧୦୦ ବର୍ଷ ପୂର୍ତ୍ତି ଉପଲକ୍ଷେ ଡିଜିଟାଲ ମାଧ୍ୟମରେ ସ୍ମାରକୀ ଡାକ ଟିକେଟ ଉନ୍ମୋଚନ କରିଛନ୍ତି। ଏହି ଅବସରରେ କଟକସ୍ଥିତ ସ୍ୱରାଜ ଆଶ୍ରମ (Cuttack Swaraj Ashram ) ଠାରେ ଏକ ଜନସମାରୋହ ଆୟୋଜନ କରାଯାଇଥିଲା। ଏଥିରେ କଟକ ସାଂସଦ ଶ୍ରୀ ଭର୍ତ୍ତୃହରି ମହତାବ, ରାଜ୍ୟ ଓଡ଼ିଆ ଭାଷା, ସଂସ୍କୃତି, ପର୍ଯ୍ୟଟନ ମନ୍ତ୍ରୀ ଶ୍ରୀ ଜ୍ୟୋତିପ୍ରକାଶ ପାଣିଗ୍ରାହୀଙ୍କ ସମେତ ଡାକ ବିଭାଗର ବରିଷ୍ଠ ଅଧିକାରୀମାନେ ଯୋଗ ଦେଇଥିଲେ।

ପ୍ରଥମ ଥର ପାଇଁ ୧୯୨୧ ମାର୍ଚ୍ଚ ୨୩ ତାରିଖରେ ମହାତ୍ମା ଗାନ୍ଧୀ ଓଡ଼ିଶାକୁ ଆଗମନ କରିଥିଲେ। ଭାରତ ଇତିହାସର ଏହି ଗୁରୁତ୍ୱପୂର୍ଣ୍ଣ ଘଟଣାର ସ୍ମୃତିରେ ସ୍ମାରକୀ ଡାକ ଟିକେଟ ଉନ୍ମୋଚନ କରାଯାଇଥିଲା। ଏହି ଘଟଣା ଅସହଯୋଗ ଆନ୍ଦୋଳନକୁ ସକ୍ରିୟ କରିଥିଲା ଏବଂ ସ୍ୱାଧୀନତା ଆନ୍ଦୋଳନର ଲକ୍ଷ୍ୟକୁ ଆହୁରି ସୁଦୃଢ଼ କରିଥିଲା। ମହାତ୍ମାଗାନ୍ଧୀଙ୍କ ଗସ୍ତ ସମୟରେ ବହୁସଂଖ୍ୟକ ଯୁବକ ସ୍ୱାଧୀନତା ଆନ୍ଦୋଳନରେ ଝାସ ଦେଇଥିଲେ ଏବଂ ମହିଳାମାନେ ନିୟମିତ ଭାବେ ଚରଖା ଚଳାଇ ସାଧାରର ଜନତାଙ୍କ ମଧ୍ୟରେ ଖଦୀର ବ୍ୟବହାର ପାଇଁ ପ୍ରଚାର କରିଥିଲେ। ମହାତ୍ମା ଗାନ୍ଧୀଙ୍କ ଯାଦୁକରୀ ବ୍ୟକ୍ତିତ୍ୱ ପ୍ରଭାବରେ ଅନୁପ୍ରାଣିତ ହୋଇ ଓଡ଼ିଶା, ଜାତୀୟ ଆନ୍ଦୋଳନରେ ସକ୍ରିୟ ଭାବେ ସମ୍ପୃକ୍ତ ହୋଇଥିଲା।

କେନ୍ଦ୍ରମନ୍ତ୍ରୀ ଶ୍ରୀ ଧୋତ୍ରେ ଏହି ଅବସରରେ ଉଦବୋଧନ ଦେଇ କହିଥିଲେ ଯେ ଆଜି ସାରା ଭାରତ “ଆଜାଦୀ କା ଅମୃତ ମହୋତ୍ସବ” ପାଳନ କରୁଛି। ମହାତ୍ମା ଗାନ୍ଧୀଙ୍କ ଓଡ଼ିଶା ଆଗମନ ଭଳି ଐତିହାସିକ ଦୃଷ୍ଟିରୁ ଗୁରୁତ୍ୱପୂର୍ଣ୍ଣ ଘଟଣାର ୧୦୦ ବର୍ଷ ପୂର୍ତ୍ତି ଉପଲକ୍ଷେ ଏକ ଡାକ ଟିକେଟ ଉନ୍ମୋଚନ କରାଯିବା ଏହି ମହୋତ୍ସବର ଏକ ଅଂଶବିଶେଷ। ଆଗାମୀ ଦିନରେ, ଡାକ ବିଭାଗ ପକ୍ଷରୁ ଭାରତର ସ୍ୱାଧୀନତା ସଂଗ୍ରାମରେ ଗୁରୁତ୍ୱ ବହନ କରୁଥିବା ଘଟଣାର ସ୍ମୃତିରେ ଏପରି ଆହୁରି କାର୍ଯ୍ୟକ୍ରମ ଆୟୋଜନ କରାଯିବ।

ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ (PM Narendra Modi) ଙ୍କ ଦୂରଦୃଷ୍ଟି ସମ୍ପନ୍ନ ନେତୃତ୍ୱରେ ଆରମ୍ଭ କରାଯାଇଥିବା ‘ଏକ ଭାରତ ଶ୍ରେଷ୍ଠ ଭାରତ’ କାର୍ଯ୍ୟକ୍ରମର ଗୁରୁତ୍ୱ ବିଷୟରେ ଶ୍ରୀ ଧୋତ୍ରେ ଉଲ୍ଲେଖ କରିଥିଲେ । ସେ କହିଥିଲେ ଯେ ଏହି କାର୍ଯ୍ୟକ୍ରମ ଅନ୍ତର୍ଗତ ବିଭିନ୍ନ ରାଜ୍ୟ ଓ କେନ୍ଦ୍ର ଶାସିତ ପ୍ରଦେଶଗୁଡ଼ିକୁ ପରସ୍ପର ସହ ଯୋଡ଼ାଯାଇଛି ଯେପରିକି ମହାରାଷ୍ଟ୍ର ସହ ଓଡ଼ିଶା, ଗୋଆ ସହିତ ଝାଡ଼ଖଣ୍ଡ, ଦିଲ୍ଲୀ ଓ ସିକ୍କିମ ଆଦି।

ଏହାଦ୍ୱାରା ପରସ୍ପରର ସଂସ୍କୃତି, ଭାଷା, ସାହିତ୍ୟ, ନୃତ୍ୟ କଳା ଏବଂ ଆହୁରି ଅନେକ ଦିଗରେ ଗୋଟିଏ ରାଜ୍ୟ ଅନ୍ୟ ରାଜ୍ୟ ସହ ଭାବବିନିମୟ କରିପାରିବେ, ଶିଖିପାରିବେ ଓ ଗ୍ରହଣ କରିପାରିବେ। ଏହା ଭାରତକୁ ଗୋଟିଏ ରାଷ୍ଟ୍ର ଭାବେ ଆହୁରି ସୁଦୃଢ଼ କରିବ। ଆଜିର କାର୍ଯ୍ୟକ୍ରମ ଏ ଦିଗରେ ଏକ ପ୍ରୟାସ ବୋଲି ଶ୍ରୀ ଧୋତ୍ରେ କହିଥିଲେ।

ଆଜି ଉନ୍ମୋଚନ ହୋଇଥିବା ସ୍ମାରକୀ ଡାକ ଟିକେଟ ଯୁବକ, ମହିଳା, ବୁଦ୍ଧିଜୀବୀ ଓ ସାଧାରଣ ଜନତାଙ୍କ ପାଇଁ ଏକ ପ୍ରେରଣା ସାଜିବ। ୧୦୦ ବର୍ଷ ପୂର୍ବେ ଉପନିବେଶବାଦର ଶାସନ ସମୟରେ ସମାଜ ଭୋଗିଥିବା ଯନ୍ତ୍ରଣାକୁ ହୁଏତ ବର୍ତ୍ତମାନର ସମାଜ ଅନୁଭବ କରିନପାରେ।

ସ୍ମାରକୀ ଡାକ ଟିକେଟର ପ୍ରଥମ ଦିବସ ପ୍ରଚ୍ଛଦରେ ସ୍ଥାନ ପାଇଛି କଟକର ସ୍ୱରାଜ ଆଶ୍ରମ ଯେଉଁଠି ୨୩ ମାର୍ଚ୍ଚ, ୧୯୨୧ରେ ପ୍ରଥମ ଥର ଓଡ଼ିଶା ଆସିବା ସମୟରେ ମହାତ୍ମା ଗାନ୍ଧୀ ଅବସ୍ଥାନ କରିଥିଲେ।

ସ୍ମାରକୀ ଡାକ ଟିକେଟ, ପ୍ରଥମ ଦିବସ ପ୍ରଚ୍ଛଦ ଏବଂ ସୂଚନା ପୁସ୍ତିକା ଦେଶର ବିଭିନ୍ନ ସ୍ଥାନରେ ଥିବା ୭୬ଟି ଫିଲାଟେଲିକ ବ୍ୟୁରୋରେ ବିକ୍ରି ପାଇଁ ଉପଲବ୍ଧ ରହିଛି।

[amazon_auto_links id=”10233″]

Also Read | Reservation: ସରକାରୀ ହାଇସ୍କୁଲ ଛାତ୍ରଛାତ୍ରୀଙ୍କୁ ଡାକ୍ତରୀ ଓ ଇଂଜିନିୟରିଂ ନାମଲେଖାରେ ମିଳିବ ୧୫ ପ୍ରତିଶତ ସଂରକ୍ଷଣ