ICMR ଓ Bharat Biotech କୋଭାକ୍ସିନ ଟିକାର କୋଭିଡ୍ ବିରୋଧରେ ପ୍ରତିରୋଧ ଦକ୍ଷତା ୮୧ ଶତାଂଶ ପ୍ରମାଣିତ
ଭାରତ ଭ୍ୟାକ୍ସିନ ସୁପର ପାୱାର
ନୂଆଦିଲ୍ଲୀ: ଭାରତୀୟ ଭେଷଜ ଗବେଷଣା ପରିଷଦ (ICMR) ଏବଂ ଭାରତ ବାୟୋଟେକ୍ ଇଣ୍ଟରନ୍ୟାସନାଲ ଲିମିଟେଡ (BBIL) ର ମିଳିତ ସହଯୋଗରେ ବିକଶିତ କୋଭାକ୍ସିନ ଟିକା (Covaxin Vaccine) ର ତୃତୀୟ ପର୍ଯ୍ୟାୟ କ୍ଲିନିକାଲ ପରୀକ୍ଷଣରୁ ଅତି ଉତ୍ତମ ସଫଳତା ମିଳିଛି। ଏହା କୋଭିଡ୍-୧୯ ନିରାକରଣ କ୍ଷେତ୍ରରେ ୮୧ ଶତାଂଶ ସଫଳ ହୋଇପାରିବ ବୋଲି ଏହି ପରୀକ୍ଷାରୁ ଜଣାପଡିଛି। କୋଭାକ୍ସିନ ଏବେ ଏକ ମଧ୍ୟବର୍ତ୍ତୀକାଳୀନ ଟିକାଭାବରେ ବିକଶିତ ହୋଇଛି।
ମଣିଷଙ୍କ ଉପରେ ଏହି ତୃତୀୟ ପର୍ଯ୍ୟାୟ ପରୀକ୍ଷଣ ଆଇସିଏମ୍ଆର ଏବଂ ବିବିଆଇଏଲ୍ର ମିଳିତ ଉଦ୍ୟମରେ ୨୦୨୦ ନଭେମ୍ବର ମଧ୍ୟଭାଗରେ କରାଯାଇଥିଲା ଏବଂ ତାହାର ତଥ୍ୟ ଏବେ ପଦାକୁ ଆସିଛି। ଏହି ପରୀକ୍ଷାରେ ୨୧ଟି ସ୍ଥାନରେ ୨୫୮୦୦ ବ୍ୟକ୍ତିବିଶେଷଙ୍କୁ ଏହି ଟିକା ଦିଆଯାଇ ଏହାର ଦକ୍ଷତା ଓ ଭଲମନ୍ଦ ଅନୁଧ୍ୟାନ କରାଯାଇଥିଲା। ସେଥିରୁ ମିଳିଥିବା ତଥ୍ୟ ଅନୁସାରେ ଏହି ଟିକାର ମଧ୍ୟମାବଧି ଦକ୍ଷତା ୮୧ ଶତାଂଶ। ଏହି ତଥ୍ୟକୁ ଏକ ସ୍ୱାଧୀନ ଡାଟା ସେଫ୍ଟି ଓ ମନିଟରିଂ ବୋର୍ଡ (Data Safety and Monitoring Board) ଅନୁଧ୍ୟାନ କରି ଅନୁମୋଦନ କରିଛି। ଭାରତର ଭେଷଜ ନିୟନ୍ତ୍ରକ ମହାନିର୍ଦେଶକ (DGCI) ଏବଂ ଅନ୍ୟାନ୍ୟ ଆନ୍ତର୍ଜାତିକ ସଂସ୍ଥାଦ୍ୱାରା ନିର୍ଦ୍ଧାରିତ ମାନ ଅନୁସାରେ କୋଭାକ୍ସିନର ଏହି ଟିକା ବିଶ୍ୱର ଅନ୍ୟ ପ୍ରମୁଖ କରୋନା ଟିକା ସହିତ ସମାସ୍କନ୍ଧ। ‘ଆରମ୍ଭରୁ ଶେଷ ଯାଏଁ ସଂପୂର୍ଣ୍ଣଭାବେ ଦେଶୀ ବିଦ୍ୟାବୁଦ୍ଧିରେ ପ୍ରସ୍ତୁତ ଏହି ଟିକା ପାଇଁ ୮ ମାସରୁ କମ୍ ସମୟ ଲାଗିଛି। ଏହାଦ୍ୱାରା ଆତ୍ମନିର୍ଭର ଭାରତ ଅଭିଯାନକୁ ଏକ ବିରାଟ ସଫଳତା ମିଳିଛି।
ବିଶ୍ୱବ୍ୟାପୀ କରୋନା ବିରୋଧୀ ଲଢେଇ ଚାଲିଥିବାବେଳେ ଭାରତ ସେହି ପ୍ରତିକୂଳ ସ୍ଥିତିକୁ ପ୍ରତିହତ କରି ଏହି ଟିକା ବିକଶିତ କରିବା ସହିତ ବିଶ୍ୱ ଦରବାରରେ ସଗର୍ବେ ଦଣ୍ଡାୟମାନ ହୋଇଛି। ଏହା ମଧ୍ୟ ଭାରତକୁ ବିଶ୍ୱର ଏକ ପ୍ରମୁଖ ଭ୍ୟାକ୍ସିନ ସୁପର ପାୱାରଭାବେ ଭପସ୍ଥାପିତ କରିଛି’ ବୋଲି ଆଇସିଏମ୍ଆରର ମହାନିର୍ଦେଶକ ଡ. ବଳରାମ ଭାର୍ଗବ କହିଛନ୍ତି। କୋଭାକ୍ସିନ ପ୍ରଥମ କୋଭିଡ୍ ଟିକାଭାବେ ସଂପୂର୍ଣ୍ଣଭାବେ ଭାରତରେ ବିକଶିତ ହୋଇଛି। ମାର୍ଚ୍ଚ ୨୦୨୦ରେ ଆଇସିଏମ୍ଆରର ଜାତୀୟ ଭୂତାଣୁ ଗବେଷଣା ପ୍ରତିଷ୍ଠାନରେ ସାର୍ସ-କୋଭଟୁ (Sars-Cov2) ଭୂତାଣୁର ପୃଥକୀକରଣ ସଫଳତାର ସହ କରାଯାଇଥିଲା। ଏଥିପାଇଁ ଆଇସିଏମ୍ଆର ବିବିଆଇଏଲ୍ ସହ ଅଂଶୀଦାର ହୋଇ ଅଲଗା ହୋଇଥିବା ଭୂତାଣୁକୁ ବିକଶିତ କରି ଏକ ସଫଳ ଟିକା ତିଆରି କରିବାକୁ କାର୍ଯ୍ୟ ଆରମ୍ଭ କରିଥିଲା। ଇନ୍ଭିଟ୍ରୋ ପରୀକ୍ଷା ଏବଂ ଇଲେକ୍ଟ୍ରନ ମାଇକ୍ରୋସ୍କୋପି ଅନୁଧ୍ୟାନ ମାଧ୍ୟମରେ ମିଳିତଭାବେ ଏହି ଟିକାର ବିକାଶ କରାଯାଇଥିଲା।
ମଣିଷଠାରେ ପରୀକ୍ଷାମୂଳକ ପ୍ରୟୋଗ ପୂର୍ବରୁ ଏହି ଟିକାକୁ ପ୍ରଥମେ କ୍ଷୁଦ୍ର ଜୀବ ଓ ମୂଷା ଆଦିଙ୍କ ଉପରେ ପରୀକ୍ଷାମୂଳକଭାବେ ପରୀକ୍ଷା କରାଯାଇଥିଲା। ଏଥିରୁ ଏହାର ନିରାପତ୍ତା ଓ ରୋଗ ପ୍ରତିଷେଧକ ଶକ୍ତି ଜଣାପଡିଥିଲା। ଏହାପରେ ଏହି ଟିକାକୁ ବାନର ଜାତୀୟ ପ୍ରାଣୀଙ୍କ ଉପରେ ପରୀକ୍ଷା କରାଯାଇ ସେଥିରୁ ସଫଳତା ମିଳିଥିଲା। ଏହା ପରେ ମଣିଷଙ୍କ ଦେହରେ ଏହାର ପ୍ରଥମ ଓ ଦ୍ୱିତୀୟ ପର୍ଯ୍ୟାୟ ପରୀକ୍ଷା କରାଯାଇଥିଲା। ଏଥିରେ ୭୫୫ ଜଣ ଭାଗ ନେଇଥିଲେ। ଏହାର ନିରାପତ୍ତା ଓ ଦକ୍ଷତା ମଧ୍ୟ ବେଶ୍ ଭଲ ପ୍ରମାଣିତ ହୋଇଥିଲା।
କୋଭାକ୍ସିନ ଟିକା ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ର ପ୍ରାକ ସର୍ତ୍ତାବଳୀ ଆଧାରରେ ପ୍ରସ୍ତୁତ ହୋଇଛି। ଏହି ସର୍ତ୍ତାବଳୀ ସମଗ୍ର ବିଶ୍ୱ ପାଇଁ ପ୍ରଯୁଜ୍ୟ ; କାରଣ ଏହା ନିରାପଦ ଓ ବିଶ୍ୱସନୀୟ। ଏହି ଟିକା ମଧ୍ୟ ସାର୍ସ-କଭ-ଟୁ ବା କରୋନାର ବ୍ରିଟିଶ ପଜାତିକୁ ଦମନ କରିବାରେ ନିକଟରେ ପ୍ରମାଣିତ ହୋଇଛି।
ଭାରତ କୋଭାକ୍ସିନ ଟିକା ବିକଶିତ କରି ଏହାକୁ ବ୍ୟବହାର ଉପଯୋଗୀ କରିଥିବାରୁ କରୋନା ବିରୋଧୀ ଲଢେଇରେ ନିଜ ପାଇଁ ଆଉ ଏକ ଅସ୍ତ୍ର ତିଆରି କରିଛି। କୋଭିଡ୍ ବିରୋଧୀ ଲଢେଇରେ ବିଜୟ ହାସଲ ପାଇଁ ଏହି ଟିକାର ସୁଦୂର ପ୍ରସାରୀ ପ୍ରଭାବ ରହିବ ବୋଲି ଆଇସିଏମ୍ଆରର ମହାମାରୀ ଏବଂ ସଂକ୍ରମିତ ବ୍ୟାଧି ବିଭାଗର ମୁଖ୍ୟ ତଥା ଜାତୀୟ ଏଡ୍ସ ଗବେଷଣା ପ୍ରତିଷ୍ଠାନର ନିର୍ଦେଶକ ଡ. ସମୀରଣ ପଣ୍ଡା କହିଛନ୍ତି।
[amazon_auto_links id=”9932″]
Also Read | Similipal: ଶିମିଳିପାଳ ଅଭୟାରଣ୍ୟରେ ନିଆଁ, ଲିଭା କାର୍ଯ୍ୟରେ ଲାଗିଛି ୪୦ ଦମକଳ
