ଯଦି ସୁଶାନ୍ତଙ୍କ ପିତା ସିବିଆଇ ଯାଞ୍ଚ ଦାବି କରନ୍ତି ତେବେ ବିହାର ସରକାର ସୁପାରିଶ କରିବେ: ମୁଖ୍ୟମନ୍ତ୍ରୀ ନିତୀଶ କୁମାର
ପାଟନା : ବର୍ତ୍ତମାନ ବଲିଉଡ ଅଭିନେତା ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ରହସ୍ୟ ଜାଣିବାକୁ ତଦନ୍ତ ଚାଲିଛି। ବିହାର ପୋଲିସ ମୁମ୍ବାଇରେ ପହଞ୍ଚି ସୁଶାନ୍ତଙ୍କ ଭଉଣୀ, ପୂର୍ବତନ ଗର୍ଲଫ୍ରେଣ୍ଡ ଅଙ୍କିତା ଲୋଖଣ୍ଡେ, ରୋଷେଇଆ , ତାଙ୍କ ସାଙ୍ଗ ଏବଂ ସହକର୍ମୀଙ୍କ ସମେତ ୬ ଜଣଙ୍କ ବିବୃତ୍ତି ରେକର୍ଡ କରିଛି। ତେବେ ସୂଚନାନୁସାରେ, ବିହାରରୁ ତଦନ୍ତ ପାଇଁ ଆସିଥିବା ଦଳକୁ ମୁମ୍ବାଇ ପୋଲିସ ସମର୍ଥନ କରୁନାହିଁ। ଏହି ସମୟରେ ବିହାର ମୁଖ୍ୟମନ୍ତ୍ରୀ ନୀତୀଶ କୁମାର କହିଛନ୍ତି ଯେ ଯଦି ସୁଶାନ୍ତଙ୍କ ପିତା ସିବିଆଇ ତଦନ୍ତ ଦାବି କରନ୍ତି ତେବେ ସେ ଏହାକୁ ସୁପାରିଶ କରିବେ।
ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ଏକ ଘରୋଇ ନ୍ୟୁଜ ଚ୍ୟାନେଲ ସହିତ ଫୋନ୍ ବାର୍ତ୍ତାଳାପରେ କହିଛନ୍ତି ଯେ ରାଜ୍ୟ ସରକାର ଏହି ପ୍ରସଙ୍ଗରେ ଗମ୍ଭୀର ଦୃଷ୍ଟି ଦେଉଛନ୍ତି। ସୁଶାନ୍ତଙ୍କ ପିତା ପାଟନାର ରାଜୀବନଗର ଥାନାରେ ଏକ ମାମଲା ଦାୟର କରିଥିଲେ ଏବଂ ଆମ ପୋଲିସ ତଦନ୍ତ ପାଇଁ ମୁମ୍ବାଇରେ ପହଞ୍ଚିଛି। ସେ କହିଛନ୍ତି ଯେ ଯଦି ସୁଶାନ୍ତଙ୍କ ପିତା ସିବିଆଇ ତଦନ୍ତ ଦାବି କରନ୍ତି ତେବେ ରାଜ୍ୟ ସରକାର ଏହା ଉପରେ ପରାମର୍ଶ ଦେଇପାରିବେ। ବିହାର ସରକାର ସିବିଆଇ ତଦନ୍ତ ପାଇଁ ସୁପାରିଶ କରିପାରନ୍ତି।
ସୁଶାନ୍ତ ସିଂ ରାଜପୁତଙ୍କ ଆତ୍ମହତ୍ୟା ଘଟଣାର ତଦନ୍ତ କରୁଥିବା ବିହାର ପୋଲିସ ମୁମ୍ବାଇ ପୋଲିସର ସମର୍ଥନ ପାଇନାହିଁ। ବିହାର ପୋଲିସ ଖୁବ ଶୀଘ୍ର ମୁମ୍ବାଇ ପୋଲିସର ବରିଷ୍ଠ ଅଧିକାରୀଙ୍କ ନିକଟରେ ଅଭିଯୋଗ କରିବ। ଡିଜିପି ଗୁପ୍ତେଶ୍ୱର ପାଣ୍ଡେ ବରିଷ୍ଠ ପୋଲିସ ଅଧିକାରୀଙ୍କ ସହ ମାମଲାର ସମୀକ୍ଷା କରିଥିଲେ। ଏହି ସମୟ ମଧ୍ୟରେ ଏହା ସାମ୍ନାକୁ ଆସିଥିଲା ଯେ ମୁମ୍ବାଇ ପୋଲିସ ତଦନ୍ତରେ ସହଯୋଗ କରୁନାହିଁ।
ବିହାର ପୋଲିସ ଏହି ଘଟଣାର ତଦନ୍ତ କରୁଛି। ଏଥିରେ ସୁଶାନ୍ତଙ୍କ ବ୍ୟାଙ୍କ ଆକାଉଣ୍ଟ ଯାଞ୍ଚ ମଧ୍ୟ ଅନ୍ତର୍ଭୁକ୍ତ। ବ୍ୟାଙ୍କ ଆକାଉଣ୍ଟରେ କେତେ ଟଙ୍କା ଥିଲା ଏବଂ କେଉଁଠାରେ ଏବଂ କେବେ ଟ୍ରାନ୍ସଫର କରାଯାଇଥିଲା ତାହା ମଧ୍ୟ ଅନୁସନ୍ଧାନ କରାଯାଉଛି। ଏଥିରେ ରିୟା ଚକ୍ରବର୍ତ୍ତୀଙ୍କ ଭୂମିକା କ’ଣ? ଏହି ପ୍ରସଙ୍ଗରେ ସୁଶାନ୍ତଙ୍କ ନିକଟ ସମ୍ପର୍କୀୟଙ୍କଠାରୁ ତଥ୍ୟ ସଂଗ୍ରହ କରିବାକୁ ଉଦ୍ୟମ କରାଯାଉଛି।
