ଯାତ୍ରା ଖଳନାୟକ ଭିକୁ ସେଠ୍ ଙ୍କ ପରଲୋକ

ଭୁବନେଶ୍ୱର: ଯାତ୍ରା ଖଳନାୟକ ଭିକୁ ସେଠ୍ ଙ୍କ ପରଲୋକ ହୋଇଛି। କଟକ ଚୌଦ୍ୱାର ସ୍ଥିତ ବାସଭବନରେ ଆଜି ୫୫ ବର୍ଷ ବୟସରେ ମହେନ୍ଦ୍ର ଦାସ ଓରଫ ଭିକୁ ସେଠ୍ ଙ୍କ ଦେହାନ୍ତ ହୋଇଯାଇଛି। ଯାତ୍ରା ଜଗତ ପାଇଁ ଏକ ଅପୂରଣୀୟ କ୍ଷତି ବୋଲି କୁହାଯାଉଛି।

ମହେନ୍ଦ୍ର ଦାସ, ଭିକୁ ସେଠ୍ ନାଁରେ ଓଡ଼ିଶାର ଯାତ୍ରା ଦର୍ଶକମହଲରେ  ପରିଚିତ ଥିଲେ। ଯାତ୍ରା ଜଗତରେ ତାଙ୍କ ଲୋକପ୍ରିୟତା ବହୁତ ଥିଲା।  ଯାତ୍ରା ଜଗତରେ ନାମୀ କଳାକାରଙ୍କ ମଧ୍ୟରେ ସେ ଥିଲେ ଜଣେ। ନବେ ଦଶକର ଚର୍ଚ୍ଚିତ ଯାତ୍ରା ଜନତା ଗଣନାଟ୍ୟର ‘ଶାଗୁଣା ବସିଛି ଡେଣା ମେଲାଇ’ରୁ  ରାତାରାତି ଲୋକପ୍ରିୟତା ହାସଲ କରିଥିଲେ ମହେନ୍ଦ୍ର ଦାସ। ସେହି ଦିନଠାରୁ ତାଙ୍କୁ ସମସ୍ତେ ଭିକୁ ସେଠ୍ ନାମରେ ଜାଣିଲେ ଆଉ ଏହି ନାଁରେ ସେ ପରିଚିତ ହେଲେ। ସେ ମାତ୍ର ଗୋଟିଏ ଓଡିଆ ଚଳଚିତ୍ର ଯଶୋଦା ରେ ଅଭିନୟ କରିଥିଲେ। ଦୀର୍ଘ ୩୦ ବର୍ଷର ଯାତ୍ରା ଅଭିନୟରେ ଅନ୍ତ ଘଟିଛି। ତାଙ୍କ ନିଧନରେ ଯାତ୍ରା ଜଗତରେ ଶୋକର ଛାୟା ଖେଳିଯାଇଛି।