ଗୃହ ମନ୍ତ୍ରଣାଳୟ ଦ୍ଵାରା ଅନଲକ୍ -୨ ନୂତନ ନିର୍ଦ୍ଦେଶାବଳୀ ଜାରି

କଣ୍ଟେନମେଣ୍ଟ ଜୋନ୍ ବାହାରେ ଥିବା ଅଞ୍ଚଳରେ ଅଧିକ କାର୍ଯ୍ୟକଳାପ ଖୋଲିବା ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ଅନଲକ୍ -୨ ପାଇଁ ନୂତନ ନିର୍ଦ୍ଦେଶାବଳୀ ଜାରି କରିଛି | ନୂତନ ନିର୍ଦ୍ଦେଶାବଳୀ ଜୁଲାଇ ୧ଠାରୁ କାର୍ଯ୍ୟକାରୀ ହେବ। ଆଜି ଜାରି କରାଯାଇଥିବା ନୂତନ ନିର୍ଦ୍ଦେଶାବଳୀ, ରାଜ୍ୟ ଓ  କେନ୍ଦ୍ରାଞ୍ଚଳ ରୁ ପ୍ରାପ୍ତ ମତାମତ ଏବଂ ସମ୍ପୃକ୍ତ କେନ୍ଦ୍ରୀୟ ମନ୍ତ୍ରଣାଳୟ ଏବଂ ବିଭାଗ ସହିତ ବ୍ୟାପକ ପରାମର୍ଶ ଉପରେ ଆଧାରିତ ଅଟେ।

ଖବର ଅନୁସାରେ,ଅନଲକ୍-୧ ଓ ମେ ୩୦ ରେ ଜାରି କରାଯାଇଥିବା ନିର୍ଦ୍ଦେଶାବଳୀ ଅନୁଯାୟୀ, କେତେକ କାର୍ଯ୍ୟକଳାପ, ଯଥା, ଧାର୍ମିକ ସ୍ଥାନ ଏବଂ ସର୍ବସାଧାରଣଙ୍କ ପାଇଁ ଉପାସନା ସ୍ଥାନ, ହୋଟେଲ, ରେଷ୍ଟୁରାଣ୍ଟ ଏବଂ ଅନ୍ୟାନ୍ୟ ଆତିଥ୍ୟ ସେବା,ଏବଂ ସପିଂ ମଲ୍, କଣ୍ଟେଣ୍ଟମେଣ୍ଟ ଜୋନ୍ ବାହାରେ ଯେମିତି ଚଳୁଛି ସେମିତ ଚାଲୁ ରହିବ ।

ଅନଲକ୍ -୨ ରେ କଣ କଣ ଖୋଲାରହିବ

• ଘରୋଇ ବିମାନ ଏବଂ ଯାତ୍ରୀବାହୀ ଟ୍ରେନକୁ ସୀମିତ ଅନୁମତି ଦିଆଯାଇଛି।
• ନାଇଟ୍ କର୍ଫ୍ୟୁ ସମୟ ରାତି ୧୦ ରୁ ସକାଳ ୫ ପର୍ଯ୍ୟନ୍ତ ବଳବତ୍ତର ରହିବ।
• ଏକାଧିକ ସିଫ୍ଟରେ ଶିଳ୍ପ ୟୁନିଟ୍ ଗୁଡିକର ନିରବିହୀନ କାର୍ଯ୍ୟ, ଜାତୀୟ ତଥା ରାଜ୍ୟ ରାଜପଥରେ ବ୍ୟକ୍ତି ତଥା ସାମଗ୍ରୀର ଗତିବିଧି, ମାଲ ପରିବହନ ଏବଂ ଅନଲୋଡିଂ ଏବଂ ବସ୍, ଟ୍ରେନ୍ ଏବଂ ବିମାନରୁ ଓହ୍ଲାଇବା ପରେ ବ୍ୟକ୍ତିଙ୍କ ଗନ୍ତବ୍ୟ ସ୍ଥଳକୁ ଯିବା ପାଇଁ ରାତିର କର୍ଫ୍ୟୁରେ କୋହଳ  ପ୍ରଦାନ କରାଯାଇଛି ।
• ଦୋକାନଗୁଡିକ ରେ ଏକ ସମୟରେ ୫ ରୁ ଅଧିକ ବ୍ୟକ୍ତି ରହିପାରିବେ।  କିନ୍ତୁ ସେମାନଙ୍କୁ ପର୍ଯ୍ୟାପ୍ତ ସାମାଜିକ  ଦୂରତା ବଜାୟ ରଖିବାକୁ ପଡିବ ।
• ଜୁଲାଇ ୧୫ ଠାରୁ କେନ୍ଦ୍ର ଏବଂ ରାଜ୍ୟ ସରକାରଙ୍କ ତାଲିମ ପ୍ରତିଷ୍ଠାନଗୁଡ଼ିକୁ କାର୍ଯ୍ୟ କରିବାକୁ ଅନୁମତି ଦିଆଯିବ।

ଅନଲକ -୨ ରେ କଣ କଣ ବନ୍ଦ ରହିବ

• ମେଟ୍ରୋ ରେଳ,ସିନେମା ହଲ୍, ଜିମ୍ନାସିୟମ୍, ସୁଇମିଂ ପୁଲ୍, ମନୋରଞ୍ଜନ ପାର୍କ, ପ୍ରେକ୍ଷାଳୟ, ବାର୍, ଅଡିଟୋରିୟମ୍, ଆସେମ୍ବଲି ହଲ୍ ଏବଂ ସମାନ ସ୍ଥାନ।
• ସାମାଜିକ ,ରାଜନୈତିକ , କ୍ରୀଡା ,ମନୋରଞ୍ଜନ ,ଏକାଡେମିକ୍ ,ସାଂସ୍କୃତିକ , ଧାର୍ମିକ କାର୍ଯ୍ୟ ଏବଂ ଅନ୍ୟାନ୍ୟ।
• ରାଜ୍ୟ ଓ କେନ୍ଦ୍ରାଞ୍ଚଳ ସହିତ ବ୍ୟାପକ ପରାମର୍ଶ ପରେ ନିଷ୍ପତ୍ତି ନିଆଯାଇଛି ଯେ ସ୍କୁଲ, କଲେଜ ଏବଂ କୋଚିଂ ପ୍ରତିଷ୍ଠାନ ଜୁଲାଇ ୩୧ ପର୍ଯ୍ୟନ୍ତ ପୂର୍ବ ପରି ବନ୍ଦ ରହିବ।

ପରିସ୍ଥିତି କୁ ଆଧାର କରି ଏଗୁଡିକ ଖୋଲିବାର ତାରିଖ ପୃଥକ ଭାବରେ ପରେ  ନିଷ୍ପତ୍ତି ନିଆଯିବ।

୩୧ ଜୁଲାଇ, ପର୍ଯ୍ୟନ୍ତ କଣ୍ଟେନମେଣ୍ଟ ଜୋନ କୁ କଡାକଡି ଭାବରେ ଲାଗୁ ହେବ। କଣ୍ଟେନମେଣ୍ଟ ଜୋନ୍ ମଧ୍ୟରେ, କଠୋର ପରିସୀମା ନିୟନ୍ତ୍ରଣ ରଖାଯିବ ଏବଂ କେବଳ ଜରୁରୀ କାର୍ଯ୍ୟକଳାପକୁ ଅନୁମତି ଦିଆଯିବ।

ସେହିପରି,ଅସୁରକ୍ଷିତ ବ୍ୟକ୍ତି, ଯଥା, ୬୫  ବର୍ଷରୁ ଅଧିକ ବ୍ୟକ୍ତି, ସହ-ରୋଗରେ ଆକ୍ରାନ୍ତ ବ୍ୟକ୍ତି, ଗର୍ଭବତୀ ମହିଳା ଏବଂ ଦଶ  ବର୍ଷରୁ କମ୍ ପିଲାମାନେ, ଆବଶ୍ୟକୀୟ ଆବଶ୍ୟକତା ପୂରଣ କରିବା ଏବଂ ସ୍ୱାସ୍ଥ୍ୟ ଉଦ୍ଦେଶ୍ୟ ବ୍ୟତୀତ ଘରେ ରହିବାକୁ ପରାମର୍ଶ ଦିଆଯାଇଛି।